Gleðibankagaurinn 22 árum seinna!

Já sko!

Í kjölfar tilbúinnar dramadrottningar sem dreifði ókurteisi og frekju til fólks siglir rólegaheitajaxlinn Eiríkur Hauksson.  Með gítarskotið rólyndisþungarokk!

Bara flott.  Ég sjálfur var hrifnastur af lagi dr. Gunna (reyndar kannski hlutdrægur, er mikill aðdáandi doktorsins) en lag Eiríks kom þar mjög stutt á eftir.  Tala nú ekki um þegar eðalFlensborgarinn Gunnar Þór er framarlega með gítarinn sinn.

Þetta kom þægilega á óvart.  Eftir hlægilegt bull í X-factornum á föstudaginn og nokkur önnur dæmi um óskynsamar símakosningar hélt ég hreinlega að rokkari á fimmtugsaldri (eða eldri!) ætti ekki séns í slíkri kosningu.  En gott að sjá að þjóðin getur valið flott lög og fína söngvara.  Eins gott að Ellý og Páll Óskar völdu ekki Eurovisionlagið!

EN, að lokum býð ég mig fram!  Þeim sem ekki vita það er nú bent á það góðfúslega að hér skrifar einbeittur Eurovisionaðdáandi.  Reyni að missa ekki af viðburðinum og leita uppi lög og keppnir, á sjónvarpsstöðvum og á netinu.  Elska góð partý!  Þess vegna finnst mér ég hinn fullkomni arftaki Eiríks í Skandinavísku undirbúningsþáttunum.  Áralöng dönskukennslureynsla í ofanálag Eurovisionæðisins gerir mig að hæfum frambjóðanda. Please Palli - pick me!!!!

En, nú er bara að vona að Eiki syngi sig í úrslitin svo að kosningakvöldinu á Íslandi verði hægt að eyða í alvöru íslenskum Eurovisionfíling fram að fyrstu tölum!!!!

Eiríkur Hauksson verður fulltrúi Íslands í Helsinki

Athugasemdir

[Vilborg Traustadóttir, 18.2.2007 kl. 11:12]

Sammála Maggi.  Eiríkur var flottur.  Mér fannst reyndar öll lögin hafa eitthvað flott við sig.  Það greip mig samt mest viðlagið í "lófalestri" Eiríks.  Styð þig í stað Eiríks í þættina góðu.  (Má hann ekki vera þar þegar hann tekur þátt)? 

[Emil Tölvutryllir (IP-tala skráð) 19.2.2007 kl. 14:41]

sammála því að eiríkur hauksson á eftir að standa sig betur en silvía nótt ....

[Fanney Dóra Sigurjónsdóttir, 19.2.2007 kl. 17:32]

Mér þykir leitt að tilkynna þér þetta...

[Magnús Þór Jónsson, 19.2.2007 kl. 20:10]

Ussssss.  Redda þessu, hvað var aftur númerið hans Eika Hauks....

[Fanney Dóra Sigurjónsdóttir, 19.2.2007 kl. 20:31]

Æji.. ég eyddi því úr mínum síma þegar mig vantaði pláss fyrir númer gaursins í Two tricky!