Ná böndum?

Jæja vinirnir.

Ég satt að segja átta mig ekki alltaf á því sem kemur fram frá SUS-urum.  Snilldarhugmynd áður eins og lögleiða sölu fíkniefna og að leggja niður RÚV auðvitað klassískar hugmyndir sem fá mig ekki til að horfa í átt til þeirra.

Ég satt að segja sé ekki að SUS starfi í þeim anda sem Sjálfstæðisflokkurinn gerir, hvað þá að taka sig til núna og biðja um að einkavæða orkufyrirtæki!

Sitt má nú sýnast hverjum, en í bili held ég allavega að það sé ekki tímabært að selja öll eggin úr gullkörfunni úr landi og ég er ekki tilbúinn að trúa því að þingmenn eða borgarfulltrúar flokksins séu sammála þessu.  Þetta allavega skaðar ímynd hans nú!

Kannski er kominn tími til að forystan nái böndum á hugmyndaauðgi SUS-ara sem oft á tíðum er í besta falli á kjánalegum brautum.

SUS vill einkavæða Orkuveitu Reykjavíkur

Athugasemdir

[Predikarinn - Cacoethes scribendi , 20.9.2010 kl. 11:21]

Ja sér er nú hver gullkarfan sem borgarbúar „eiga” . Það er augljóst að fyrirtæki sem þetta á ekki að ver aí höndum stjórnmálamanna. Það held ég að saga Orkuveitunnar sannist í pyngju orkukaupenda um þessar mundir illþyrmislega.

[Geir Ágústsson, 20.9.2010 kl. 12:02]

"Gullegg"?

Ég sé að lausn bloggara er að halda áfram að treysta hinu opinbera fyrir rekstri OR. Hvað þarf til að hnika við þeirra trú? 500 milljarða skuldabaggi á viðskiptavini OR? 

[Fannar frá Rifi, 20.9.2010 kl. 12:37]

gullegg? kallaru það gull egg þegar 5 milljarða hagnaður á þessu ári er ekki nægjanlegur til þess að fyrirtækið geti staðið í skilum á sínum lánum og þarf að hækka gjöld um aðra 5 milljarða. ofan á það bætist að á næstu árum þarf svo að auka tekjur OR um aðra 5 til 10 milljarða. hvaðan koma þeir peningar? þeir koma úr vasa almennings til þess að gulleggið verði ekki gjaldþrota.

[Magnús Þór Jónsson, 20.9.2010 kl. 13:54]

Orkuveita Reykjavíkur er gullegg ef þau eru til.

Hins vegar er rétt að vegna óstjórnar hefur það gullegg misst ljómann.  Til að það ljómi aftur þarf að endurskipuleggja fyrirtækið og á þeim tímapunkti er bara alls ekki vitlaust að fá inn fjárfesta sem tilbúnir væru að koma að minnihlutaeign í fyrirtækinu.  En það er ekki strax og mjög mikilvægt að ekki komi til brunaútsölu á því núna.

Svo þarf líka að skoða einkageirann sanngjörnum augum.  Stærstu skuldir íslensks almennings í dag eru vegna misnotkunar einstaklinga á markaðnum, sem ekki var stofnað til af opinberum aðilum.

Skuldsettasta atvinnugrein landsins er svo sjávarútvegurinn, kannski er lausnin þar bara að opna á að erlent fjármagn komi þar að og greiði upp skuldir sem lenda þá í staðinn ekki á almenningi.

Ég segi nei við því, og því að seldur verði aðgangur að auðlindum okkar.  Þegar mesta ólgan sest verður hægt að fara yfir málin á nýtt og þá mun frjálsi markaðurinn skipta mestu máli, reyndar vonandi verður búið að taka til í regluverkinu sem að fjármagninu stendur!