Mánudagur er ekki mæðudagur!

Jæja, fjölskyldan að skríða nær fullri heilsu.  Hvorugt heimilishjúanna lagði þó í líkamsrækt í dag en stefnir á slíkt á morgun.  Vonandi að það takist.

Helgin annars fín, þrátt fyrir slappleika.  Fórum í 210 ára afmæli á laugardaginn fyrir árshátíð Snæfellsbæjar, þ.e. sameiginlegt tugaafmæli fjögurra samstarfskvenna minna.  Fékk þar að heyra um tvo kæki sem ég hef ekki fattað um mig áður.  ´

Annar er sá að ég nota mikið orðið "klárlega", hinn að ég slái oft með hægri lófa létt á vinstra viðbein á meðan ég er að tala á fundum.  Ég vissi fyrst ekki hvað var verið að tala um!  En svo heyrði ég á fólki að þetta var málið!

Árshátíðin var fín, fullt af skemmtiatriðum og gleði.  Frumtónleikar kennarastofubandsins bara ásættanlegir.  Fyrsta lag, Jambuleo, gekk ekki nægilega vel hjá trymblinum (mér) en síðan lagaðist það stöðugt.  Wild thing (nr. 4) og I will survive (nr. 5) enduðu tónleikana ágætlega.

Flottur fiðringur að vera uppi á sviði að spila!

Sunnudagurinn var svo hinn fullkomna slökun, náttföt og kósíheit.  Ákváðum að enginn úr fjölskyldunni skyldi fara út úr húsi svo öllum tækist að byrja rútínuna, vinnu og leikskóla, á mánudegi.

Það tókst og allir glaðir með það, þannig að mánudagur er ekki mæðudagur!

Á fimmtudag kemur ný skoðanakönnun inn á bloggsíðuna, miðvikudagur því sá síðasti til að skutla atkvæði um skólamál og alþingiskosningar í vor.

Athugasemdir

[Drífa Þöll (IP-tala skráð) 19.3.2007 kl. 23:17]

maggi minn, það kemur engum á óvart að fólk hafi tekið eftir þessum kækjum! klárlega höfum við sem nálægt þér stöndum tekið eftir þessu (klapp klapp klapp á vinstra viðbein)