Sjónvarpskvöld

Stöð 2

Sérkennilegur jólaþáttur Loga Bergmanns Eiðssonar.  Mér hefur fundist þessir þættir fínir en í kvöld fannst mér tvennt ekki passa. 

Ótrúleg framkoma Loga Bergmanns gagnvart Kolbrúnu Halldórsdóttur.  Ég efast ekki um að þetta átti að vera góðlátlegur gáski hjá Loga karlinum, en í raun birtust ótrúlegir fordómar gagnvart þeim sem borða eingöngu grænmeti.  Logi og Sigurður Kári sátu og birtu stórkarlalegar hugrenningar um fullkomið skilningsleysi á þeim lífsstíl á meðan Sigurður var ekki spurður neitt út í sínar neysluvenjur.

Kolbrún var undrandi en stóð sig vel.  Hef ekki haft mikið álit á henni, en þarna bjargaði hún Loga úr slæmri klípu.

Svo var jólalag Sprengihallarinnar ódýr leið hjá þeim til að fá viðbrögð og hlátur.  Léleg útgáfa af hugmyndum Baggalúts í besta falli og afar ósmekklegur subbuskapur í því versta.

RÚV

Útsvarsþættirnir halda áfram að vera skrýtnir.  Í kvöld var fáránlegur mismunur á stóru spurningunum Garðbæingum í hag.  Vilhjálmur stórskemmtikraftur hafði vissulega fundið brosið og var bara ekki svo leiðinlegur en síðasti hluti keppninnar verður að bjóða upp á svipað erfiðar spurningar við sömu stigaþætti.

Mynd af Mbeki annars vegar og svo fyrsta útgáfuár Barbie hins vegar er ekki svipað.

En Oliver Twist reddaði svo sjónvarpskvöldi í kjölfar stórkostlegrar matarveislu í Rifinu, nánar tiltekið í verbúðinni hjá Esjari SH.  Stórfengleg skata með hnoðmör í aðalrétt, gellur og saltfiskur steikt upp úr hvítlaukssmjöri aukaréttur.

Vel gott!!!

Athugasemdir

[Guðmundur Arnar Guðmundsson, 23.12.2007 kl. 18:20]

Sammála þér varðandi framkomu Loga. Ömurlegt og ég er í raun hissa á því að Kolbrún skuli ekki hafa staðið upp og labbað út í miðju viðtali. Hann og Sigurður Kári voru eins barnalegir og hrokafullir.

Ósammála þér varðandi jólalag Sprengjuhallarinnar. Flott og beitt ádeila á okkur sem höfum það svo gott meðan bræður okkar og systur annars staðar í heiminum lifa við ömurlegar aðstæður, ótta og hungur.

Jólakveðja að austan 

[Hulda Margrét Traustadóttir, 24.12.2007 kl. 13:01]

Gleðileg jól öll. Hafið það sem best. Magga "móða" José og Dalí.

[Vilborg Traustadóttir, 24.12.2007 kl. 16:23]

Fannst fyndið að Kolbrún spólaði upp og hakkaði Loga í sig.  Það var greinilega eitthvað samsæri í gangi milli Loga og Sigurðar Kára. Þ.e.a.s. ef þið aðhyllist svoleiðis kenningar.  Gleðileg jól!