Aðeins af mér og mínum....

Ákvað aðeins að stíga niður úr pólitíkinni og leyfa mér að skrifa aðeins um okkur hér, fjölskylduna á Selhóli 5.

Þrátt fyrir allt sem á samfélaginu dynur erum við öll í fínu standi.  Helga er þessa dagana á kafi í lokaverkefnum og lokaprófum í skólanum sínum (hún er að læra námsráðgjöf í fjarnámi muniði) og mikið álag á henni!!!  Því lýkur á föstudaginn næstkomandi þegar síðasta prófið á þessari önn klárast!

Við ákváðum að hefja vist Sólveigar Hörpu hjá dagmömmu í tengslum við þessa törn Helgu og nú fer hún til hennar Diddu hér í nágrenninu alla virka daga frá svona níu til hálf tólf.  Var erfitt fyrst en gengur bara vel núna.  Helga mætir svo í FSN 2.janúar og þá byrjar fjörið hennar þar á ný.

Sigríður Birta auðvitað eldist og stækkar.  Mikið fjör þar sem stóran mín er á ferð og stundum ber fjörið hana ofurliði.  Þá þarf auðvitað bara að skríða aðeins til pabba og mömmu og fá athygli, þá lagast allt og fallega brosið hennar birtist á ný.  Hún er orðin mikið spennt útaf ljósunum og jólahugleiðingunni, getur auðvitað ekki beðið eftir þeirri gleði allri.

Thelman mín á leið í próf í Kvennó hvar hún hefur staðið sig vel.  Byrjaði í haust í ökunámi en eilítið hefur orðið misbrestur á því dæmi öllu, þannig að pabbi þarf eitthvað að hnippa í ökukennarann sem virðist afar upptekinn, Thelmu til lítillar gleði.

Hekla kláraði hiphop dansnámskeið um helgina með sýningu á Broadway, var afar glöð með sig eftir mikið stress síðustu vikurnar.  Þær systur verða á Selhól 5 á aðfangadag og dagana þar í kring, við hlökkum öll mjög mikið til þó auðvitað verði eilítil þröng á þingi.  Svo stefnir í að tengdó birtist hér í kringum áramót.

Af mér er auðvitað allt gott.  Mikið að gera í vinnunni og viðbúið að svo verði um sinn.  Að auki er ég í formannshlutverki Lions þessa dagana og það er mikið að gera í desember, ég eilítið grænn að gera þetta allt núna, en held ég nái nú að klára þetta að lokum.  Eins og lesendur síðunnar sjá er ég eilítið upptekinn af ástandinu í landinu, en þó eru skrifin nú helsta birtingarmyndin, ég reyni af bestu getu að njóta þess að vera til, enda sáttur við allt í mínu næsta umhverfi.

Allavega, langaði að leyfa fólki að heyra aðeins annað en fréttablogg í bili.....

Athugasemdir

[Drífa systir (IP-tala skráð) 2.12.2008 kl. 12:49]

Mikið var ég glöð að sjá eitthvað annað en þus og raus um pólitík og allt vesenið í þjóðfélaginu. Ég hef miklu meiri áhuga á að sjá hvað þið eruð að bauka! Gott að heyra að öllum líði vel og það verður gaman fyrir ykkur að hafa elstu stelpurnar hjá ykkur þessi jól. Bumbukveðja úr Eyjum.

[Hulda Margrét Traustadóttir, 2.12.2008 kl. 21:04]

Sammála Drífu, gott að heyra að fjölskyldan er í góðum málum.

En það er svosem engin hissa á því að fólk skuli vera upptekið af ástandinu í landinu.

Gaman af lýsingunum af Sigríði Birtu, minnir mig óneytanlega á litríkan föður hennar sem ég vaktaði stundum í "den".

En það mikilvægasta er auðvitað fjölskyldan og hvernig allt gengur, bíð rosalega spennt eftir fréttum af tvíburunum ykkar Drífa mín. Knús til ykkar allra á Selhólnum, Vestmannaeyjunum, og á Akranesinu, þar kemur líka lítill ættingi á nýju ári. Árið 2009. verður greinilega ánægjulegt fyrir okkur ! Gangi ykkur öllum sem best.