Þetta mál er ekki búið.....

Vilhjálmur Vilhjálmsson og Ólafur F. Magnússon.

Eru þeir framtíð Reykjavíkur????

Á blaðamannafundinum í dag kom augljóslega í ljós að Ólafur mun ALDREI verða trúverðugur borgarstjóri og hreint grín að sjá Vilhjálm grípa fram í fyrir Ólafi til að segja "Ólafur er allavega jafn heilbrigður og ég var þegar ég tók við" og segja svo stuttu seinna, "ég veit ég gerði mistök".

Í Kastljósi hrósaði svo Ólafur fráfarandi borgarstjóra, sem væri frábær stjórnandi!!!!

Ef Geir H. Haarde grípur nú ekki inní og stjórnar sínum flokki hefur hann allavega sett niður í mínum augum.  Í kvöld varð til nýr R-listi, þeir sem glöddust mest voru fjórmenningarnir í Tjarnarkvartettinum sem vita sem er að þessi ákvörðun Vilhjálms er pólitískt harakírí. 

Mest vorkenni ég því hugsjónafólki í Sjálfstæðisflokknum sem stóðu að baki tveggja pólitískra tapara á Kjarvalsstöðum í kvöld og mun á næstu vikum samþykkja stóraukna félagslega aðstoð, frítt í strætó, flugvöll í Vatnsmýri og allt annað sem Frjálslyndi flokkurinn setti fram fyrir síðustu kosningar.  Til þess eins að pólitískt úreltir einstaklingar eins og Vilhjálmur, Ólafur, Björn Bjarnason og fleiri slíkir fái að vera áhrifalausir borgarstjórar í 26 mánuði.  Gísli Marteinn og Hanna Birna þurfa nú að svara fyrir ónýtan meirihluta stjórnuðum af mönnum sem eiga traust innan við 25% borgarbúa.

Á meðan munu gömlu R-listaflokkarnir tengjast saman aftur, jafnvel með afdrifaríkum afleiðingum varðandi landstjórnina.  Ingibjörg Sólrún mun nú eiga ákaflega auðvelt með að hitta Steingrím og Guðna á þinginu og slíta stjórnarsamstarfinu.  Dagur B. Eggertsson varð í dag allt í einu pólitíkus, sem hann þurfti aðstoð við.  Þá aðstoð fékk hann úr óvæntri átt og örugglega einsdæmi í heiminum að fá eftirmæli eins og þau sem Ólafur veitti honum í kvöld!!!

En ég er ekki viss um að þetta verði fyrr en Geir hefur tjáð sig.  Atburðarásin í Reykjavík er óhugsandi á tímum Davíðs!!!  Vilhjálmur hefur greinilega misskilið stuðning Geirs við sig á sínum tíma og fer nú af stað með eigin hagsmuni í brjósti, segir já við öllu sem Ólafur segir, til þess eins að verða borgarstjóri.

Sennilega verður þeirra tveggja minnst sem lélegustu borgarstjóra í sögu Reykjavíkur!!!!

Forustumenn stjórnarflokka tjá sig ekki

Kútmagakvöld í Röstinni!

Í kvöld er einn stærsti viðburðurinn í atburðadagatalinu á Hellissandi.  Kútmagakvöld okkar Lionsmanna, þar sem íbúar Snæfellsbæjar, 60 ára og eldri eru settir í aðalhlutverk.

Við Helga fórum í fyrra og það var heljargaman, svo ekki sé nú meira sagt!  Maturinn er náttúrulega forn að flestu leyti, þó auðvitað séu líka réttir úr nútímanum.  Allt sjávarfang.  Í aðalhlutverkinu auðvitað sjálfir kútmagarnir.  Eða kúttmagarnir?? 

Fyrir þá sem ekki vita er kútmagi nafn yfir það þegar þorskalifur er sett inn í þorskmaga og þetta er svo soðið við lágan hita í langan tíma.  Önnur tegund er svo blanda af þorskalifur og rúgmjöli inn í magann, sama eldunaraðferð.  Ég ætla nú ekki að skrökva því að þetta sé uppáhaldsmaturinn minn, en þó er sá með rúgmjölinu fínn og það er þrælskemmtilegt að borða svona öðruvísi mat.  Meðal annarra rétta er auðvitað hákarl og harðfiskur, siginn fiskur, gellur auk rétta úr skötuselnum, ýsunni, löngunni og öllu því.

Skemmtiatriðin koma úr ranni heimamanna, í mér er mikil tilhlökkun að fá að heyra Fúsa félaga minn syngja Roger Whittaker lög, sá eðalmaður örugglega með eðalbarka!  En fyrst og síðast er auðvitað skemmtilegast að krydda tilveruna smá, þó í kvöld sé maður líka í smá þjónustuhlutverki sem Lionsmaður.

Það eina sem skyggir á er að húsfrúin á heimilinu hefur verið mjög slæm í magapest og treystir sér ekki með í þetta skiptið.  Stóð sig vel í kútmaganum í fyrra!  Maður stoppar þá auðvitað bara styttra í kvöld.

Annars bara allt gott, var kosinn í stjórn Skólastjórafélags Vesturlands á aðalfundi í Borgarnesi á fimmtudaginn, ánægður með það traust.

Svo erum við Helga að fara á Akranes á mánudaginn að hitta læknana á sjúkrahúsinu þar.  Stefnt er að fæðingu erfingjans þar og við munum þá ákveða hvort við ákveðum fæðingardag, þ.e. förum í keisaraskurð sem ákveðinn verður fyrirfram.

Meira af því síðar.....

Grétar frændi minn!

Lofa þeim sem ekki hafa gaman af boltanum því að fara að minnka boltabloggið en auðvitað verð ég að óska öðrum eðaldreng, sem mér finnst að mörgu líkur Bjarna Þór sem ég bloggaði um síðast.

Nefnilega honum Grétari Steins, frænda mínum.  Á þetta auðvitað skilið strákurinn, hefur þurft að hafa fyrir ferlinum sínum hingað til og gott að hann er kominn til Englands.  Ef ég man rétt er drengurinn Poolari svo að ekki verður nú leiðinlegt fyrir hann að fá að mæta á Anfield.

Verst þykir mér að hafa ekki náð að sjá hann í Alkmaar, en maður kíkir bara á Reebok einhvern tíma í staðinn.

Gangi þér vel Grétar KS-ingur, en ekki of vel gegn Liverpool!!!!

Grétar Rafn samdi við Bolton til fjögurra ára

Gangi þér vel strákur!

Öðlingsdrengur hann Bjarni Þór, er alveg sannfærður að hann á eftir að ná mjög langt í íþróttinni, án vafa einn eftirminnilegasti leikmaður sem ég hef fengið að þjálfa, einstaklega ákveðinn og agaður, með afskaplega "víða" hæfileika innan vallar.

Vona að hann nái fínni lendingu í sín mál, þarf auðvitað að fara að fá að spila meistaraflokksfótbolta og er sannfærður um að hollenskur fótbolti hentar honum vel.

Ekki verður nú verra að hann skili bláa Evertonbúningnum, var satt að segja eilítið skelkaður um það að honum tækist að ná í liðið þar, hefði verið ómögulegt annað en að halda pínulítið með honum, sem er náttúruleg hræðileg hugsun fyrir Liverpoolaðdáenda.

En vona að allt gangi vel hjá Bjarna.  Hlakka til að sjá hann í framtíðinni.......

Bjarni til reynslu hjá Twente

Eiðamanneskja fallin

Sælt veri fólkið!

Á mánudaginn hélt ég suður á bóginn, endaði í Fríkirkjunni í Hafnarfirði til að vera viðstaddur útför Birnu Björnsdóttur, Birnu í Endurvarpinu.

Birna bjó á Eiðum öll þau ár sem ég var þar, og bjó þar áfram eftir að við fluttum.  Til dánardægurs, en hún lést af völdum andstyggðarveiki sem virðist leggja marga að velli þessi árin, krabbameinið.

Birnu kynntist ég fyrst og fremst sem móður Rögnu, mikillar vinkonu minnar sem á alla mína samúð þessa dagana, kynntist eilítið þeirri angist sem fylgir því að fylgjast með baráttu móður manns við krabbamein, en mín vann þó sigur gegn því.  Seinna kynntist ég Birnu sem samnemanda í Alþýðuskólanum á Eiðum.  Innan um okkur vitleysingana á síðgelgjunni.  Hefur ekki verið létt.

En mig langar að votta Birnu virðingu mína og ættingjum samúð.

Erfidrykkja Birnu var falleg stund, þar sem Eiðafjölskyldan öll átti fulltrúa. Því miður hittumst við alltof sjaldan, þeir sem bjuggu á þessum yndislega stað svo lengi.  Síðast þegar það gerðist var það í jarðarför sómakonunnar Valgerðar.

Ég ræddi það við hann pabba minn, og vona að eitthvað verði úr, að kannski væri kominn tími á að við Eiðabúar tækjum okkur til og reyndum að finna vettvang til að hittast.  Þarna voru allir vinir, óháð aldri og stöðu, allir skiptu þar máli og í nútíðinni og framtíðinni langar mann til að frétta af þessu fólki og hitta til að spjalla.

Áfram Eiðar!!!!!

Góður Þorsteinn!

Þorsteinn Þorsteinsson er mikill skólamaður.

Því kynntist ég þegar konan mín vann hjá honum í FG.  Á þeim tíma fór hún auðvitað á böll með nemendum og tók þátt í félagslífi þeirra sem eftirlitsaðili.

Veit þess vegna að þessi umræða er ekki ný.  Og auðvitað er þetta hárrétt umræða.  Ég hef hreint aldrei skilið það hvers vegna 16 ára böll voru slegin af um allt land, þ.e. úr samkomuhúsunum eins og Miðgarði, en leyfð í Reykjavík, undir yfirskininu "Framhaldsskólaböll".  Dauðatjöldin flutt inní kompur skemmtistaða.  Nemendur sem í maí kveðja grunnskólann sinn algerlega vímulaust á lokaballinu sínu, þar sem ekkert umburðarlyndi er fyrir drykkju, heilsa framhaldsskólanum sínum í ágúst á "busa"böllum þar sem meirihluti ballgesta er undir áhrifum vímuefna!

Og það er hárrétt hjá Þorsteini að foreldrar halda partý heima hjá sér fyrir slík böll, skreppa bara frá á meðan.  Svo eru þeir látnir sækja barn sitt upp úr miðnættinu vegna ofdrykkju og hringja alveg brjálaðir í skólann daginn eftir út af því að börnin skyldu vera svo drukkin.

Þetta hef ég oft heyrt, ekki bara frá FG, heldur líka úr öðrum skólum!

Gott Þorsteinn, gangi þér vel í þessu, vonandi fylgja fleiri á eftir.  Mín skoðun er að framhaldsskólar eigi að halda kefli grunnskólans um áfengislausar skemmtanir hátt á lofti og flytja allar skemmtanir inn í skólana, ef börn 16 - 19 ára vilja skemmta sér með áfengi eiga skólarnir ekki að útvega til þess aðstöðu.  Þetta er bara spurningin um að taka ákvörðun og standa við hana!

Svo er bara næst að hætta að leyfa ofbeldi gagnvart 16 ára börnum 1 - 2 daga á ári, þ.e. hætta að "busa" nýnema framhaldsskólanna.  Hvað er það eiginlega!!!!!!!

Þreyttir á drykkju nemenda sinna

Gleðilegt ár öll!

Þá er árið 2007 að baki með öllum sínum plúsum og mínusum.  Í annálum ársins verður þetta mikið átakaár og í fréttaannálum gærdagsins var margt stórt á ferð.

Hér á Hellissandi hefur aðalmál ársins verið aðlögun að nýju samfélagi og allt sem flutningum milli staða fylgir.

Okkur finnst ganga vel hér og hlökkum til framtíðarinnar.  Árið 2008 verður auðvitað sögulegt að því leyti að þá kemur nýr einstaklingur í fjölskylduna hér.  Þá verður auðvitað kátt í koti!!!

Gleðilegt ár kæru vinir og megi nýtt ár bera gæfuna til ykkar.

Gamlárskvöld framundan.

Mikið óskaplega er nú gaman að vera svona heppinn að fá að vera í jólafríi. 

Reyndar hef ég þurft að kíkja á vinnuna mína annað slagið, en þá á þeim tímum sem mér hentar og því getað lagað fjölskyldulífið að því.  Enda höfum við bara haft það ansi gott.

Jólin voru náttúrulega ein samfelld matarveisla, sem byrjaði á frábærri skötuveislu hjá kvótahjúunum Möggu og Brynjari, afa og ömmu á Spáni eins og Birta kallar þau.  Þau eiga bátinn Steinunni SH sem dóttir mín yngsta hikar ekki við að sýna öllum sem vilja sem sinn bát!  Stefnir í að verða kvótaprinsessa sýnist okkur. 

Á aðfangadag klæði ég mig alltaf í kokksgallann.  Byrjaði á að útbúa "Ris a la mande" sem er að verða hefðbundinn eftirréttur þann daginn.  Það gerði ég í samfellu með möndluhrísgrjónagrautnum í hádeginu, sem by the way Helga Lind vann.  Þegar það var komið í farveg var að baða humarinn í hvítlauksblöndu og útbúa brauðið með.  Síðast en ekki síst voru svo nautalundirnar hanteraðar fyrir eldun. 

Þetta tókst allt alveg frábærlega og máltíðin frábær hjá okkur þremur sem dvöldumst hér, eldri dæturnar hjá mömmu þessi jólin. 

Á jóladag var náttfatadagur og hangiket, svo var haldið suður á annan í jólum.  Fyrst jólaboð hjá tengdó, svo þann 27. hjá Símoni, Siggu frænku Helgu og kvöldmatarboð hjá pabba og Gullu.

28. var svo hjá mömmu og við keyrðum svo heim í bölvuðu skítaveðri í gær. 

Í dag er svo 30.desember, dagurinn þar sem stelpurnar mínar eldri ætluðu að koma vestur.  Því miður virðast veðurguðirnir ekki samþykkja það þessa stundina, albrjálað veður hér núna og meira og minna ófært á landinu.  Vona nú að spáin standist og eitthvað gangi niður eftir hádegið, svo að við pabbi getum staðið við það að hittast með þær í Borgarnesi í dag......

Auðvitað gengur það eftir og þá verður heldur betur gaman í kvöld, þá verður pizzaveisla og pabbajól, þegar stelpurnar taka upp sínar gjafir og við hin þrjú fáum svona eina og eina til að vera með þeim í jólafýlingnum.

Svo er það náttúrulega gamlársdagur og kvöld, sennilega uppáhaldsdagurinn minn hvert ár!

Gleðilegt ár vinir mínir, megi það næsta færa ykkur endalausa gæfu!

Síðbúin jólakveðja

Hæ öll.

Sendi ykkur öllum nær og fjær óskir um gleðileg jól og gæfu á nýju ári, um leið og ég þakka ykkur heimsóknirnar inn á þessa síðu.

Njótið af heilum hug friðar og gleði jólanna, etið, drekkið og verið glöð! 

Vonandi næ ég að hitta sem flest ykkar sem fyrst og mest á nýja árinu. 

Maggi á Selhólnum.

Sjónvarpskvöld

Stöð 2

Sérkennilegur jólaþáttur Loga Bergmanns Eiðssonar.  Mér hefur fundist þessir þættir fínir en í kvöld fannst mér tvennt ekki passa. 

Ótrúleg framkoma Loga Bergmanns gagnvart Kolbrúnu Halldórsdóttur.  Ég efast ekki um að þetta átti að vera góðlátlegur gáski hjá Loga karlinum, en í raun birtust ótrúlegir fordómar gagnvart þeim sem borða eingöngu grænmeti.  Logi og Sigurður Kári sátu og birtu stórkarlalegar hugrenningar um fullkomið skilningsleysi á þeim lífsstíl á meðan Sigurður var ekki spurður neitt út í sínar neysluvenjur.

Kolbrún var undrandi en stóð sig vel.  Hef ekki haft mikið álit á henni, en þarna bjargaði hún Loga úr slæmri klípu.

Svo var jólalag Sprengihallarinnar ódýr leið hjá þeim til að fá viðbrögð og hlátur.  Léleg útgáfa af hugmyndum Baggalúts í besta falli og afar ósmekklegur subbuskapur í því versta.

RÚV

Útsvarsþættirnir halda áfram að vera skrýtnir.  Í kvöld var fáránlegur mismunur á stóru spurningunum Garðbæingum í hag.  Vilhjálmur stórskemmtikraftur hafði vissulega fundið brosið og var bara ekki svo leiðinlegur en síðasti hluti keppninnar verður að bjóða upp á svipað erfiðar spurningar við sömu stigaþætti.

Mynd af Mbeki annars vegar og svo fyrsta útgáfuár Barbie hins vegar er ekki svipað.

En Oliver Twist reddaði svo sjónvarpskvöldi í kjölfar stórkostlegrar matarveislu í Rifinu, nánar tiltekið í verbúðinni hjá Esjari SH.  Stórfengleg skata með hnoðmör í aðalrétt, gellur og saltfiskur steikt upp úr hvítlaukssmjöri aukaréttur.

Vel gott!!!