Kleinubakstur, bolti, réttir og sunnudagaskóli

Þetta er það sem er framundan hér!

Í dag og kvöld ætlum við, starfsfólk Grunnskólans að baka kleinur fyrir söfnunina okkar.  Við erum að fara til Belfast í námsferð  í nóvember og því verður þvílíkt bakstursstuð eftir skólann í dag!  Alltaf voðalega gaman að standa í svona streði, en styrkir auðvitað líka vináttuna hér.

Á morgun er réttardagur í Snæfellsbæ.  Ég ætla með Heklu og Birtu allavega í réttir, ætla að gera tilraun til að ná unglingnum með, en er ekki viss um að það gangi.  Því miður hleypti ég henni í það að verða unglingur áður en ég rammaði inn í hana sveitamennskuna.  Eins og henni fannst það nú gaman að þvælast í kringum dýr hér fyrir stuttu. 

Í bænum eru margar réttir.  Á Breiðinni, í Ólafsvík, í Breiðuvíkinni og á Ölkeldu.  Held meira að segja að ég sé að gleyma einni!  Við ætlum á Breiðina fyrst, um hádegið.  Þar eru frístundabændurnir norðan megin að rétta.  Mig langar mikið að verða frístundabóndi, en ætla ekki alveg að leggja í það strax.  Svo reyndar truflar það mig pínulítið að Víkingar eiga síðasta heimaleikinn sinn kl. 13:30.  Mig langar til að sjá hann, en vill alls ekki missa af Ölkelduréttinni í Staðarsveit.  Það er hörkurétt, sem endar á þvílíku hnallþóruboði á bæjunum að annað eins sést varla.  Sannkallað hreppsmót.  Skipulagið verður skoðað á morgun með boltann í aukahlutverki.

Svo er fyrsti sunnudagaskólinn í Ingjaldshólskirkju á sunnudaginn.  Þangað verður stormað með fröken Sigríði Birtu, fannst hún aðeins of ung í fyrra, en nú ætlum við að sækja okkur tilbreytingu á sunnudögum.  Hún að vísu er aðeins að rugla saman orðum og er stöðugt að minna föður sinn á það að í sunnudagaskólum fer maður í sund.  Útskýringar föðurins duga lítið gegn tárvotum barnsaugum sem ætla í sund í "sundagaskóla".....

Fréttir af helginni munu berast á mánudag, sjáum hvernig "sundferðin" í sunnudagaskólann fer!

Athugasemdir

[Vilborg Traustadóttir, 21.9.2007 kl. 11:58]

Thelma í réttirnar-ekki spurning...man hvað ég var "heimóttleg" sem unglingur aftan á heikvíslinni á dráttavélinni að fara með hrútana inn á Dalabæ.  Horfði laumulega í allar áttir þegar hinir "forfrömuðu" siglfirðingar óku hjá.  Núna er þetta æðisleg minning...Thelma draga í dilka með bændunum takk!!!!

[Matta (IP-tala skráð) 21.9.2007 kl. 15:45]

Hæ hæ

Ég mæli með Ráðhúsinu í Belfast, mjög gott kexið þar og vatnið enn betra . Svo á hann Patrekur borgarstjóri líka ótrúlega flott gullhálsmen heheh.

Kveðja Matta

[Drífa Þöll (IP-tala skráð) 21.9.2007 kl. 16:58]

ég skil vel að Sigríður Birta vilji heldur fara í sund, ég myndi vilja það frekar, en það er kannski bara ég... vonandi skemmta eldri dæturnar sér vel í sveitinni. knús...

[Sigríður Hallsteins. (IP-tala skráð) 22.9.2007 kl. 22:46]

Það hefði nú verið gaman að sjá þig í Grafarrétt í Breiðuvíkinni Ég var þar eftir langar og mis árangursríkar smalamennskur. En ég lít alltaf á þetta sem skemmtun og hef mjög gaman af að elta rollurassa eins og sumir myndu orða það. Að maður minnist nú ekki á smalasögurnar sem koma á eftir En vonandi skemmtuð þið ykkur í réttunum, kveðja, Sigga.