Koma svo!

Fyrsti leikur þessara liða sem ég man eftir.

Tvö af mínum uppáhalds.  Vona að við fáum skemmtun!!!!!

Gerrard byrjar á bekknum

Gat ekki valið mér fyrirsögn!

Veit ekki hvað úr viðtalinu hægt er að pikka út sem fyrirsögn.

En þvílíkt viðtal.  Davíð er óhugnanlega sterkur í svona viðtölum, auðvitað er í honum hroki fyrir því hvernig eigi að spyrja og hvaða reglum eigi að fylgja, en hann verður ekki sakaður um það að fara á taugum í beinni.

Auðvitað talaði hann ekki eins og embættismaður, heldur pólitíkus og það á hann auðvitað ekki að gera í dag.  Enda bíð ég spenntur eftir því þegar hann losnar úr viðjum þess embættis og leyfir okkur hinum að heyra það sem hann veit.

Því það er það sem stendur eftir í mínum huga eftir þetta viðtal.  Davíð Oddsson hefur alveg örugglega miklar upplýsingar um spillingu þá sem hefur grasserað í íslensku viðskipta- og stjórnmálalífi undanfarin ár og ég er alveg sannfærður um að hann mun koma léttur og kátur út úr bankanum í lok þessarar viku og lætur gamminn geysa.

Hann getur það ekki í því embætti sem hann situr í nú um þessar stundir.

Í gær heyrði ég þá kjaftasögu að upphlaup Höskuldar á mánudaginn tengdist þessu óbeint, renna væru á tvær grímur meðal stjórnmálamanna hvort losa eigi Davíð fyrr en að loknum kosningum því einhverjum þyki óhugnanlegt að hann leysi frá skjóðunni í aðdraganda þeirra.  Og þar séu stjórnmálamenn í mörgum flokkum undir!

Davíð Oddsson verður í sögunni settur á stall með mörgum öðrum pólitíkusum.  Hann á í dag fleiri óvini en vini og það held ég að tengist ekki Seðlabankanum.  Heldur því að verið er að reyna að holdgerva hann sem sökudólginn stóra.

Sem ég held að sé alveg kolrangt.  Það er staðreynd að peningamálastefnan fór á hliðina, en það var fyrst og fremst vegna þess að bönkunum voru gefin of mikil völd.

Sigmar gleymdi náttúrulega að spyrja hann út í þátt hans í regluverkinu, sem Davíð auðvitað ber mikla ábyrgð á.  En ég er algerlega sammála þessari söguskýringu Davíðs.

Og mig langaði að stökkva upp og fagna þegar hann kom með þá tvo punkta sem eru lykillinn í næstu skrefum landsins okkar!!!

Í fyrsta lagi er kominn tími á að fara í gegnum frumskóg einkahlutafélaga!!!  Þar eru tugir og hundruðir mála þar sem einstaklingar gömbluðu með hlutabréf en hentu svo skuldunum aftur fyrir sig og á okkur öll, en ekki nokkur maður hefur viljað hreyfa við!  Þetta hef ég bloggað hér áður en lítið orðið var við að umræða sé um.

Reynið nú að þagga það niður, þá fyrst sjáum við hvort Davíð er að vaða reyk!

Og svo endaði Davíð á að nefna þá augljósu staðreynd að ekki nokkur maður er að reyna að sameina þjóðina og tala í hana kjark!  Ég er ákafur málsvekjandi þess að það þurfi að reyna að vinna í því að hjálpa því fólki og hópum sem sárast eiga og fara að vinna að varanlegum lausnum einhverra þeirra mála sem minnka sortann fyrir augum.

En í staðinn eyðir stór hluti þjóðarinnar sínum tíma í að byggja upp múra og búa til átök, auk annars hluta sem rær lífróðri að fela sinn hlut í hruninu eða er í sérhagsmunagæslu fyrir hópa og flokka.

Á því hef ég ímugust og skora á fólk að fara að tala kjark í hvert annað og ráðast í það verk að búa til betra og jákvæðara samfélag í stað svika, rifrilda og átaka.

En Davíð kom vel útúr þessu Kastljósi fyrir mér og ég allavega bíð spenntur eftir að heyra það sem hann hefur að segja að embættisstimplinum foknum!

SÍ varaði í febrúar við hruni í október

Erum við að verða vitni að hruni heimsveldis???

Nú kemur upp í manni mannkynssögukennarinn!

Rómaveldi náði yfir aldir, líka breska krúnan.  Belgar voru eitt sinn nýlenduþjóð og Portúgalir ríkasta þjóð heims.  Frá því upp úr 1900 hafa Bandaríki Norður Ameríku verið heimsveldið, lengi í baráttu við Sovétríkin en síðustu 18 ár ríkt nokkurn veginn sem eina stórveldið, með ítök alls staðar í heiminum.  Rekið stífa heimsveldisstefnu og skipt sér af öllu, neitað að fylgja samþykktum alþjóðasamfélagsins og komið fram eins og heimsveldi gera.

Með hreinu ofbeldi.

En nú riðar veldið til falls.  Þrátt fyrir endalausa innspýtingu ríkisfjármagns dugar lítið til og stöðugt fleiri gjaldþrot vofa nú yfir.  Þessi sannleikur mun hafa áhrif á allan hinn vestræna heim sem þarf nú að herða sínar ólar um mittið verulega.  Ekki ólíklegt að valdajafnvægið sé farið að færast í austurátt.

Ekkert heimsveldi mannkynssögunnar hefur hingað til verið eilíft og B.N.A. verða það ekki.  Á næstu mánuðum kemur í ljós hvort tími þess veldis er að líða......

Bandarísk hlutabréf lækka

Eins gott að Sigmundur vann!

Og eins gott að Birkir Jón er í flokknum Framsóknar.

Ég get ekki ímyndað mér annað en að skynsemin fari nú af stað innan flokksins því það að fá frestun á þetta mál er náttúrulega svo pólitískt krítískt núna að Framsóknarflokkurinn tapar mörgu atkvæðum á dag en vinnur engin!

Vissulega er það rétt að máttur þingsins er aukinn og það sést þarna, en um leið er það ábyrgðin sem skiptir máli og það að stoppa svona mál og geyma er eins og að bjóða í svakalegt partý sem á að opna klukkan 23, en ákveða svo að spá aðeins í það 22:56 hvort maður ætli að halda partýið.  Og mígandi rigning á gestina fyrir utan dyrnar!

En Höskuldur Þór fannst mér kjánalegur í Kastljósinu og Sigmundur auðvitað reynslulaus.  Birkir stendur uppúr, sallarólegur og öruggur í þingmannsstarfinu.  Vitandi það að eftir tvo til þrjá daga hið mesta hefur málið verið klárað og það sem situr eftir verður sérkennileg ákvörðun Höskuldar.  Mun ekki fara illa með málstað Birkis í sínu kjördæmi heldur tel ég......

Enginn klofningur framsóknarmanna

Þyngist róðurinn

Maður lifandi hvað ég var svekktur að hafa eytt deginum í dapran fótboltaleik í gær. 

Sól og glæsilegt veður en ég ákvað að láta mitt ástkæra lið ganga fyrir.  Nú þarf eitthvað að gerast, helst í gær!!!

Benítez neitar að gefast upp

Geir á BBC

Svosem engin ný sannindi, en ég vona innilega að Geir H. Haarde hugsi vandlega um það að hætta við að hætta ef að læknismeðferð vinnur á því meini sem hann er að berjast við.

Auðvitað á hann að biðjast afsökunar á því að þetta hrun varð á hans vakt, en ég tel að hann sé einn fárra stjórnmálamanna okkar sem hafa áhuga á friði í samfélaginu og því ætti það að vera kostur fyrir þessa þjóð að hann verði þingmaður okkar.

Ég viðurkenni alveg að ég varð fyrir vonbrigðum með það að hann náði ekki meiri árangri sem formaður Sjálfstæðisflokksins, hann átti að vera fastari fyrir og ákveðnari í þeim áherslum sem hann trúir á og minnka hlut öfgafrjálshyggjuarmsins í flokknum.  Það tókst honum ekki og því er ég á því að hann hafi gert rétt í að vera ekki formaður áfram.

En Geir yrði góður þingmaður fyrir Íslendinga tel ég.

Svo er að vona að hinn sérstaki saksóknari finni út einhverjar merkilegar staðreyndir.  En sennilega er málið einfalt, stóreignamenn rændu almenning þessa lands í dagsbirtunni og eftirlitsstofnanirnar brugðust algerlega.  Nú er komið að því að sækja það sem hægt er af peningum almennings og búa til eftirlitskerfi sem kemur í veg fyrir annað svona áfall.

Strax.

Geir: Biðst ekki afsökunar

Siðleysið sýnir sig

Þvílíka ruglið.

Efast ekki um það að mörg svona dæmi eru í gangi nú þegar en fólk þorir ekki öðru en að láta slíkt yfir sig ganga!  Auðvitað skilur maður að einhver fyrirtæki þurfi aðgerðir til að halda sér á floti, en því miður hefur maður heyrt af svipuðum hlutum og þarna koma fram.  Sem auðvitað er ekki neitt annað en að reyna að græða á neyð fólks.

Slík fyrirtæki á að nafngreina svo að við getum ákveðið hvort við viljum styrkja þau!

Verulega þarf að fylgjast með málum eins og þessum, það er alveg viðbúið að ýmislegt í verkalýðsbaráttunni detti til baka um tugi ára, hámarksvinnutími, álag, lágmarkslaun og annað sem samið hefur verið um eftir sveitta og stundum blóðuga baráttu nú skyndilega eitthvað sem slá þarf skjaldborg um aftur.

Því börnin okkar eiga það skilið!

Vilja meira en neita að borga

Enn eitt rifrildið!

Ja svei.

Enn heldur farsinn áfram.  Nú á að rífast um álver á Bakka í stað þess að vinna að sameiginlegum hagsmunum þjóðarinnar!

Fáránlegt, enda alveg ljóst að slík umræða er óþörf, allt í gangi fyrir norðan og morgunljóst að þessi aðgerð verður ekki stöðvuð á þessum 80 dögum.

Hvenær hætta þingmenn að hugsa um kosningarnar og fara að hugsa um hag þjóðarinnar sinnar???

Ég spyr ennþá, því enn sé ég engin svör.  Þó er ég glaður að heyra það að stöðugt fleiri eru að verða sammála mér í því að ástæða sé að óttast þá sundrung sem er að verða uppi í samfélaginu og topparnir okkar virðast lítið ætla að gera til að draga úr!

Tekist verður á um Bakka

Þvílík skemmtun!

Ofboðslega var gaman af þessum leik og mikið væri nú gott ef að íslenskar sjónvarpsstöðvar myndu vera duglegri að sýna frá rimmum eins og þessum.

Körfubolti er náttúrulega íþrótt egósins og skynseminnar og í kvöld voru Grindjánarnir klárlega betri.  Einungis stuttur kafli í fjórða leikhluta þar sem KR voru líklegir til að vinna.

En takk fyrir skemmtunina bæði lið og maður getur hlakkað til úrslitakeppninnar og þá held ég að Snæfell verði líka komnir í góðan gír.

Sigurgöngu KR lauk í Grindavík

Davíð misskilur

Málið snýst ekki um hvort hann hafi gert stór mistök.  Ég held að hann hafi ekki gert stærstu mistökin, og margt hafi hann gert rétt.

En málið er einfaldlega þannig að stjórn Seðlabankans hefur glatað trausti fólksins, þ.e. meirihluta þjóðarinnar og við slíkt verður ekki búið í því ástandi sem nú er í gangi.

Davíð og Eiríkur hafa ákveðið að fara ekki burt án baráttu og nú munu næstu dagar fara í að slást um stól, eða stóla Seðlabankastjóra og á meðan mun enn draga úr tímanum sem ætti að fara í að endurreisa samstöðu Íslendinga og reyna að toga þjóðina alla í eina átt.

Í staðinn verða læti í fyrramálið við Seðlabankann og vinskapur Jóhönnu og Davíðs er úr sögunni.  Áfram er höggvið í allar áttir og þjóðin okkar er ekki á leið til sáttar.

Það finnst mér verst að Davíð átti sig ekki á og reyni að leiða til sátta, hann hefði orðið maður að meiri.

Davíð segir ekki af sér